حرم امام رضا(ع) میں کفشدار خادموں کی شفٹ کے انچارج جناب جعفر خیر زادہ نے آستان نیوز کو تفصیلات بتاتے ہوئے کہا کہ گذشتہ سال کی طرح اس سال بھی چہلم امام حسین(ع) کے ایّام کی مناسبت سے عراق کے شہر کاظمین میں سید الشہداء حضرت امام حسین(ع) کے زائرین کو مختلف خدمات فراہم کرنے کے لئے موکب لگایا ہے ۔
انہوں نے کہا کہ یہ کفشدار خادمین آج مولا رضا(ع) سے اذن لے کر ٹرین کے ذریعہ عراق کی جانب روانہ ہوگئے ہیں ۔
انہوں نے مزید یہ بتایا کہ یہ موکب چھے اگست2025 سے دس دن کے لئے کاظمین میں باب علیؑ کی جانب لگا رہے گا ر جس پر خادمین زائرین کو مختلف خدمات فراہم کریں گے۔
جناب خیرزادہ نے بتایا کہ اس موکب پر روزانہ دو ہزار افراد کو ناشتہ اور چھے ہزار افراد کو دوپہر اور شام کا کھانا کھلایا جائے گا۔
ان کا کہنا تھا کہ ان کے خادمین کے ہمراہ پچاس ایسے مرد خادم ہیں جو کئی برسوں سے حرم امام رضا(ع) میں کھانا بنا رہے ہیں اور اس کے علاوہ روٹیاں پکانے کے لئے خواتین بھی اعزازی طور پر ان خادموں کے ہمراہ ہیں۔
جناب خیرزادہ نے اپنی گفتگو کے آخر میں کہا کہ امید ہے کہ خادمین باہمی ہم آہنگی سے حضرت امام رضا(ع) اور امام حسین(ع) کی خوشنودی کے لئے خلوصِ دل کے ساتھ بے لوث خدمت کریں گے ۔
واضح رہے کہ ان خادمین کو الوداع کرنے کے لئے مشہد مقدس کے ریلوے اسٹیشن پر خصوصی الوداعی تقریب کا بھی انعقاد کیا گیا۔
حضرت ابا عبد اللہ الحسین(ع) کے چاہنے والوں کے دل چہلم امام حسین(ع) پر جانے کے لئے تڑپ رہے ہیں ،کربلا پر ختم ہونے والی تمام سڑکیں زائرین سے بھری نظر آتی ہیں ،اس موقع پر حرم امام رضا(ع) کے کفشدار خادمین(زائرین کے جوتوں کی حفاظت پر مامور) نے زائرین کی خدمت کے لئے کاظمین میں موکب لگایا ہے ۔
News Code 6890
آپ کا تبصرہ