یونیورسٹی آف میڈیکل سائنسز مشہد کے سرپرست ڈاکٹر محمود شبستری نے "ٹیکنالوجیکل" پروگرام کے ساتھ انٹرویو میں رضوی ہاسپٹل کی تاریخ کا ذکر کرتے ہوئے کہا: یہ ہسپتال ملک کے بہترین ہاسپٹلز میں سرفہرست ہے اور پچھلے دو سالوں میں اسے ملک کے سب سے بڑے اور ممتاز نجی ہسپتال کا درجہ حاصل ہے۔

انہوں نے کہا: لوگوں کو طبی خدمات فراہم کرنے کے ساتھ ساتھ رضوی ہاسپٹل طبی عملے کے لئے بھی ایک اطمینان بخش اور بہترین جگہ ہے کیونکہ اس وقت تقریباً ۵۰۰ ڈاکٹرز اس ہسپتال میں کام کر رہے ہیں۔

رضوی ہاسپٹل کے بورڈ آف ڈائریکٹرز کے اس رکن نے کہا: رضوی ہاسپٹل میں مریضوں کے داخلے کے لئے ہمارے پاس ۳۲۵ بیڈز کی سہولت موجود ہے۔ جس میں اب مزید اضافہ بھی کیا جا رہا ہے۔

انہوں نے کہا: یہ ہسپتال علاج معالجہ کے میدان میں سرگرم ہونے کے ساتھ ساتھ میڈیکل کی تعلیم کے میدان میں بھی انتہائی فعال ہے اور مشہد یونیورسٹی آف میڈیکل سائنسز کے ساتھ اس کا بھرپور تعاون جاری ہے۔

ڈاکٹر محمود شبستری نے کہا: رضوی ہسپتال میں شعبہ امراض قلب موجود ہے جہاں دل کی سرجری سمیت دل کے خصوصی آپریشنز انجام دئے جاتے ہیں۔

انہوں نے مزید کہا: رضوی ہاسپٹل میں موجود ایڈوانس طبی آلات مشرق وسطیٰ میں انفرادی حیثیت رکھتے ہیں۔ یہاں مختلف میڈیکل یونیورسٹیز کے پروفیسرز سمیت انتہائی ماہر ڈاکٹرز مریضوں کے مختلف آپریشن کرتے ہیں۔